ఈద్-ముబారక్, దండయాత్ర , వీడ్కోలు!

తెలుగు బ్లాగర్లందరికీ 'రంజాన్' పండుగ సందర్భంగా ఈద్-ముబారక్! రంజాన్ పండుగ అనగానే ఆ ముందు రోజు ఎంతో ఉత్సాహంగా పెట్టుకొనే గోరింటాకు, పొద్దున లేవగానే తలంటు పోసుకొని వేసుకొనే కొత్త బట్టలు, బంధువులందరితో కలిసి మా హిందూపురం ఈద్గాకు వెళ్లి చేసే పండుగ నమాజు, దాని తరువాత ఏది కావాలంటే అది కొనిచ్చే అవ్వ-తాతలు, పక్కింటి వారికి అందించే క్యారియర్లు, బావలు-బామ్మర్దులు అందరితో కలిసి హుషారుగా వెళ్లే సినిమాలు, అలసిసొలసి ఇంటికొచ్చి మిద్దె పైకెక్కి వినే కథలూ...ఇవన్నీ ఒక్కసారిగా కళ్ల ముందు మెదలుతాయి.

మరి ఆ అనుభూతులకు సరితూగే విధంగా చేసుకోలేకపోయినా ఉన్నంతలో మొన్న అనంతపురం బాబా టైలర్స్ నుంచి కుట్టి పంపించిన కొత్త బట్టలు, ఇంట్లో చేసిన పాయసం, మా సుహాస్ తో కలిసి వెళ్లి చేసిన పండుగ నమాజు, న్యూయార్క్ నగరం నుంచి వచ్చిన మా అతిథులతో భోజనాలు+''హ్యాపీ డేస్" సినిమా ఇలా బాగానే గడిచింది. కాకపోతే బంధుమిత్రుల ఆలింగనాలను మాత్రం బాగా మిస్సయ్యాను, అంతే కాక పైలోకాన ఉన్న మా తాతలిద్దరినీ ఇంకా చాలా మిస్సయ్యాను. మొత్తానికి పండుగంతా ముగించేసి స్వదేశంలో ఈ రోజు పండుగ జరుపుకుంటున్న బంధుమిత్రులందరికీ కాల్ చేసి శుభాకాంక్షలు తెలుపుతూ అంత ముఖ్యమూ అయిన బ్లాగ్మిత్రులతోనూ ఈ విధంగా నా ఆనందాన్ని పంచుకొంటున్నాను.

ఇక బ్లాగులకు ఓ రెండు నెలల పాటు వీడ్కోలు చెప్పుదామని నిశ్చయించాను. మరో సంవత్సరం, మరో యుద్ధం, సన్నద్ధమవ్వాలిగా అందుకు. పోయినేడాది విజయం చేజారిపోయినా మరోసారి చేసే ప్రయత్నంలో ఈ కాస్త విరామం తప్పడంలేదు. కాబట్టి ఇలా సాహితీగోష్టులకు, చర్చావేదికలకు కొంత కాలం పాటు దూరం ఉంటూ ఆ రాయలు

సీ.తొల దొల్త నుదయాద్రి శిలఁదాకి తీండ్రించు

యసి లోహమున వెచ్చనై జనించె;

మఱి కొండవీడెక్కి మార్కొని నలియైన

యల కసవాపాత్రునంటి రాఁజె

నట సాఁగి జమ్మిలోయఁబడి వేగిదహించెఁ

గోన బిట్టేర్చెఁ గొట్టానఁ దగిలెఁ

గనకగిరి స్ఫూర్తిఁ గరచె; గౌతమిఁగ్రాచె;

నవుల నాపొట్నూర రవులు కొనియె;

తే.మాడెములు వ్రేల్చె; నొడ్డాది మసి యొనర్చెఁ

గటకపురిఁ గాల్చె గజరాజు గలఁగి పఱనఁ

దోఁక చిచ్చన; నౌర నీ దురవగాహ

ఖేలదుగ్ర ప్రతాపాగ్ని కృష్ణరాయ!"

{ఆముక్తమాల్యద 1:36}

చేసిన దండయాత్ర లాగా నా ఈ దండయాత్ర న్యూజెర్సీ, న్యూయార్క్ల మీదుగా ఓహయో, పశ్చిమ వర్జీనియాలపై వెళుతూ, లూయీసియానా దగ్గర ఆగుతుంది. గెలుపెక్కడో మరి? ఈ ప్రయాణాల్లో మన బ్లాగర్లనీ కలవవచ్చేమో పోయినసారి కలిసినట్టుగా. అలాగే విజయదశమి శుభాకాంక్షలు ముందుగానే అందుకోండి. అంత వరకు టాటా...వీడుకోలు...ఇంక సెలవు!