మైఖేల్-మదన-కామరాజు!

ఏదో వారాంతంలో పాత కమల్ సినిమా చూసి ఈ సమీక్ష రాస్తున్నానని పొరబడేరు. ఇది కొత్తగా నిన్ననే న్యూజెర్సీలో విడుదలైన బి-గ్రేడ్ సినిమా (ఇక్కడ గ్రేడింగ్ తెలుగు సినీ పరిభాషలో ఇవ్వబడింది). ఇక వచ్చే వారమే నా ప్రస్తుత పరిశోధనా ఉద్యోగానికి ఆఖరి వారం, కాబట్టి నిన్నటి శుక్రవారం పొద్దున్నుంచీ రాత్రి తొమ్మిదింటి దాకా గది తలుపులు వేసుకొని మరీ పని చేసి (ఏ రోజు పని ఆ రోజు చేస్తే ఈ బాధ లేకపోవును.ఏం చేస్తాం!) అలసి సొలసి ఇంటి దారి పట్టాను. ధ.దే.ఈ.శు. అని ఉదయం ఉన్న ఉల్లాసం రాత్రికి కల్లోలంగా మారింది. కానీ ఇంతలోనే పట్టలేనంత ఉత్సాహం మళ్లీ తిరిగొచ్చింది. కారణం దారిలో ఉన్న థియేటర్లో ఈ మైఖేల్-మదన-కామరాజు!

ఆహా ఏమి నా భాగ్యమూ, ఈ న్యూజెర్సీ భోగ్యమూ...ఆఖరికి బి/సి సెంటర్లో ఆడే సినిమాలు కూడా ఇక్కడ ప్రత్యక్షమవుతూంటే అని మురిసిపోతూ, ఇంకో నెల రోజుల్లో ఈ సరదాలన్నీ దూరమవుతాయనే జ్ఞానంతో వగచిపోతూ టికెట్టు కొనడానికెళ్లాను. అప్పుడే సినిమా మొదలయ్యి పది నిముషాలయ్యింది. కానీ లోపలికెళ్లగానే ఖాళీ సీట్లు వెక్కిరించాయి. మరి సినిమా ఎవరికోసం వేసినట్టో అని కళ్లు నులుముకొని తిరిగి చూస్తే ఓ మూల మూడు తలకాయలు కన్పించాయి. ఇదే థియేటర్లో జల్సాకయితే మొదటి బుధవారం ఆటకు కూడా అన్ని సీట్లు నిండి ఓ నాలుగు మిగిలితే, ఇప్పుడు ఆ నాలుగూ నిండి మిగతావి ఖాళీగా ఉన్నాయి. ఔరా స్టార్ పవరూ! అనిపించింది.

ఇక సినిమా కొద్దాం. శ్రీకాంత్, సునీల్, ప్రభుదేవా హీరోలు. ఛార్మి, ఆశా సైనీ హీరోయిన్లు. ఇక కోట, బ్రహ్మానందం, ఆలీ, వేణుమాధవ్, మల్లిఖార్జునరావు వగైరా తారాగణం. ఇది ఫక్తు తెలుగు కామెడీ సినిమా. బుర్రకు పనిపెట్టకుండా చూసి ఆనందించగల సినిమా. కథ: ప్రేమ అంటే నమ్మకం లేని శ్రీకాంత్(మదన్) ఛార్మితో ప్రేమలో పడతాడు. బావా-బావా అని పిలుచుకొనే మిత్రద్వయం శ్రీకాంత్-సునీల్(కామరాజు). మధ్యలో పానకంలో పుడకలా ప్రభుదేవా(మైఖేల్)వస్తాడు. ప్రభుదేవా ఛార్మిని పెళ్లి చేసుకోవాలనుకొంటాడు. అందుకోసం నడిపే ఫార్సు కామెడీయే ఈ చిత్రం. చివరాఖరికి మదన్-ఛార్మి ఒక్కటవుతారు. గోవాలో కామరాజుకు పరిచయమయ్యే భామామణి 'ఆశా సైనీ' పూర్వాశ్రమంలో జేమ్స్(బ్రహ్మానందం) భార్య. ఇక జేమ్స్ ఈ కామరాజు వేటలో ఉంటాడు.

అదేంటో బ్రహ్మానందాన్ని చూస్తేనే ఈ మధ్య నవ్వు వస్తోంది. అలనాడు రేలంగిని చూస్తేనే జనం నవ్వేవారట! అన్నట్లు మొన్న 'జల్సా'లో బ్రహ్మానందం ప్రవేశ దృశ్యానికి హీరోకు పడినన్ని ఈలలు పడ్డాయి. ఇదంతా ఒక ఎత్తైతే సమయం దొరికితే చాలు సందర్భం లేకుండా బీభత్సంగా నటించే నటభేతాళ, రాష్ట్ర విఖ్యాత నట సార్వభౌముడిగా కోట. ఇక చిన్న పాత్రల్లో వేణుమాధవ్, ఆలీ. మరీ అదిరిపోయే కామెడీ కాకున్నా కొన్ని జోకులు బాగానే పండాయి. అక్కడక్కడా నవ్వాపుకోలేక పోయాను. శ్రీకాంత్ "శ్రమ తెలియకుండా" నటించేశాడు. సునీల్ మొరటు హాస్యం రొటీనే. ప్రభుదేవా ఓ పాటలో కొన్ని ఝలక్̍లిచ్చాడు. ఇక హీరోయిన్లంటారా :-) చారుమీ న'మిత' అయ్యింది ఈ సినిమాలో

ఎడిసన్ - యమదొంగ - దేశిపండిట్ - పది బ్లాగులు!

పైనున్న చిత్రంలోని విద్యుద్దీపం 'థామస్ అల్వా ఎడిసన్' పేరు మీద వచ్చిన బల్బుల్లో మొట్టమొదటిది. మా ఇంటికి ఓ పది మైళ్ల దూరంలో ఉన్న 'ఎడిసన్' (ఆయన గౌరవార్థం పెట్టిన పేరిది) పట్టణంలో ఆయన పని చేసిన 'మెన్లోపార్క్' ప్రయోగశాల నుంచి వచ్చిన అనేక సృజనల్లో ఇదీ ఒకటి. ప్రపంచంలో మొదటిసారి విద్యుద్దీపాలతో ధగధగలాడింది ఈ ప్రదేశం. కానీ మనం చిన్నప్పటి నుంచి చదువుకొన్నట్టు 'ఎడిసన్' కొత్తగా కనిపెట్టలేదీ 'బల్బు'ను, ఉన్నవాటిని మరింత ఉపయోగకరంగా మార్చాడు. అంతకు మించి వాటిని ప్రపంచం ఉపయోగించేట్టు చేశాడు. దీని కంటే ఆయనకిష్టమైన పనిముట్టు 'ఫోనోగ్రాఫ్'!

ఈ మాట్లాడే యంత్రాన్ని చూసి మొదట్లో చాలా మంది జడుసుకొన్నారట. అలాగే దూరవాణి(టెలిఫోను) లోనూ ఓ చెయ్యి వేశాడు. దాదాపు వెయ్యికి పైగా కొత్త 'పేటెంట్'లను తన పేర నమోదు చేసుకొన్న ఈ 'మెన్లోపార్క్ మాంత్రికుడు' ప్రాచుర్యం లోనికి తెచ్చిన మరో ఆసక్తికరమైన పదం ఏదో తెలుసా?...అలో.అలో..అలో...అంటూ మన 'రావుగోపాలరావు' కంఠంతో ప్రసిద్ధి గాంచిన 'హల్లో'!

కొసమెఱుపు: అమెరికాలో తెలుగు వారు గణనీయంగా ఉన్న ప్రదేశాల్లో న్యూజెర్శీలోని 'ఎడిసన్'ది ప్రథమస్థానం. కానీ నేను వెళ్లిన ఈ చిన్న మ్యూజియంలో అన్ని భాషల వారి రాతలు కనపడ్డాయి ఒక్క తెలుగు తప్ప! అందుకే ఇలా...

------

ఇక 'యమదొంగ'. సినిమా చూడలేదు, కానీ అంత కంటే ఆసక్తికరమైన విషయం ఎంటంటే...కొత్తగా 'గ్లోబల్ మూవీ సెంటర్' అంటూ మా 'నువార్క్ స్క్రీన్స్'కే పేరు మార్చి, అందులో ఓ తెరపై మన తెలుగు సినిమాలు ప్రదర్శించడం మొదలుపెట్టారు. గత మూడేళ్లుగా రోజూ ప్రయాణించే దారిలో ఉండడం మూలాన, బోరు కొట్టినప్పుడల్లా వెళ్లి హాలివుడ్ సినిమాలు చూసేవాన్ని, ఇప్పుడిక ఏకంగా తెలుగు సినిమానే చూడొచ్చు(కానీ హాలివుడ్ ఐదు వరహాలు, టాలీవుడ్ పదిహేను వరహాలు!!!). అన్నట్టు పక్కా హాలివుడ్ సినిమా చూసినా (లాస్ట్ లెజియన్) అందులోనూ 'ఐశ్వర్య' కనిపించి మురిపిస్తుంది. అబ్బో! చాలా దూరం వచ్చాం.

******

దేశరాకుమారి గురించి మాట్లాడుకొన్నాం కాబట్టి ఇప్పుడు కొత్త 'దేశిపండితుడి' పరిచయం కూడా చేస్తాను. ఈ మధ్య పని ఒత్తిడి,కుటుంబ బాధ్యతలు, చదువులు అన్నీ ఎక్కువై ఏమీ బ్లాగలేకున్నాను. అంతే కాక 'ఆంధ్రులు-ఆరంభశూరులు' అన్న నానుడిని నిజం చేస్తూ సగర్వంగా తీసుకొన్న బరువు బాధ్యతలకు న్యాయం చేకూర్చలేకపోయాను, అందుకు నా క్షమాపణలు! తెలుగు బ్లాగు ప్రపంచంలోని నవ-యువ-శశి("చుక్కలెన్ని ఉన్నా చందమామ ఒక్కడేలే...") అయిన 'వెంకట్' గారికి ఆ బాధ్యతను అప్పజెప్పాను. ఇక ఆయన 'ఐశ్వర్య'తో సినిమా తీయడమే తరువాయి!

******

ఇక 'ఆ' పది బ్లాగులూ...

1.సాలభంజికలు

2.కల్హర

3.సత్యశోధన

4.చదువరి

5.ఒరెమూనా

6.మనిషి

7.శోధన

8.అంతరంగాలు

9.స్నేహమా

10.గుండెచప్పుడు

ఈ పదే కాకుండా మది దోచినవి చాలానే ఉన్నాయి. ఉదా.విహారి,నా మదిలో, కొత్తపాళీ,24fps...మరెన్నో. తెలుగు బ్లాగులు అప్రతిహతమవుగాక!