మగమహారాజులూ...మరుజన్మ ఉంటే మగువగా పుడతారా?

రోజూలానే మా ప్రయోగశాలలో పని చేసుకుంటూ ఉంటే మా సహోద్యోగిణి అయిన నైజీరియా నారీమణి మాకు ఈ ప్రశ్న వేసింది. అక్కడున్న మేమిద్దరం ఠక్కున 'నో' అని గావుకేక పెట్టినంత పని చేశాము. వెంటనే 'ఎందుకు?' అని మళ్లీ ప్రశ్నించింది. నేను సమాధానం కోసం వెతుక్కొనే లోపలే మా లాటినో లవర్ బాయ్ 'అమ్మాయిలకు లైనేసే అదృష్టం ఎక్కడుంటుంది?' అని తిరిగి ఆమెనే ప్రశ్నించాడు.

నాకు ఆ సమాధానం సబబుగానే తోచింది:-) అమె భర్త ఇదే ప్రశ్నకు సమాధానంగా "అప్పుడు అన్ని పనులు మేమే చేసుకోవాల్సి వస్తుంది. అందుకు వద్దు బేబీ" అని అన్నాడట. నిజమే కదా! ఇంట్లో పని, వంట పని, ఉద్యోగం, పిల్లల పని, పని...పని...పని...పాపం. మొన్ననే స్వాతి గారి కవిత చదివిన వెంటనే కాకతాళీయంగా ఈ సంఘటన జరగడం ఈ వైపుకు నా ఆలోచను మరల్చింది. అన్నట్టు మా సహోద్యోగులను పరిచయం చేయలేదు కదూ!

మా బాస్ జర్మన్. ప్రశ్న అడిగిన ఆమెది నైజీరియా అని మీకు ముందే తెలుసు. ఇక ఆ మన్మథులుంగారిది డొమినికన్ రిపబ్లిక్&మెక్సికో. సియోల్ (వారు సొల్ అని పలుకుతారు) నుంచి మరో లేడీ పి.హెచ్.డి. ఇక భారతం నుంచి నేను. ఇలా ఆస్ట్రేలియా తప్ప మిగతా అన్ని ఖండాల నుంచి మా పరిశోధనశాలలో ఉన్నారు.(అంటార్కిటికా ఉంది కదా అంటారా!) విచిత్రం ఏమిటంటే అందరూ దక్షిణం వైపు వారే. మా బాస్ దక్షిణ జర్మనీ, ఇక మిగతా వారు దక్షిణ అమెరికా, దక్షిణ కొరియా, దక్షిణ భారతం ఇక నైజీరియా ఆఫ్రికా దక్షిణాన లేకపోయినప్పటికీ దక్షిణ ఖండం కింద జమకట్టాం!

అలాగే రోజూ కెఫెటీరియాలో చూసే ఓ దృశ్యం నాకు ఆనందానిస్తుంది. ఒకే బల్ల దగ్గర హిజబ్ ధరించిన ఓ ఇరానియన్ వనిత, వారి మతాచారం ప్రకారం తలపై చిన్న టోపీ ధరించిన యూదు(జ్యూఁ), ఆర్మేనియన్ క్రిస్టియన్, గుజరాతీ హిందువు, ఆఫ్ఘనిస్థాన్ ముస్లిం(ఈయనది తోరాబోరా దగ్గర పల్లె అట!), అమెరికన్ క్యాథలిక్ కబుర్లు చెప్పుకుంటూ ఎంచక్కా నవ్వుతూ, తుళ్లుతూ భోంచేస్తూ ఉంటారు. సహపంక్తి భోజనం లాగా ఇలాంటివి అన్ని చోట్ల ఉంటే ఎంత బాగుండు అనిపిస్తుంది.

ప్రశ్నకు సమాధానం ఇవ్వకుండా ఈ డొంకతిరుగుడులు ఏమిటి అనుకొంటున్నారా? ఎవర్ని ఏమార్చినా మిమ్మల్ని ఏమార్చలేం కదా! అన్నట్టు ఆమెకు మన 'జంబలకిడిపంబ' గురించి టూకీగా ఓ కథలాగా చెప్పాను, సరే అసలు విషయానికొస్తాను...స్త్రీగా పుట్టడం వల్ల కొన్ని స్వాతంత్ర్యాలను కోల్పోవాల్సి వస్తుందని నా సమాధానం. పడతులూ...నా మీద దీన్ని అలుసుగా తీసుకొని ఎగిరెగిరి పడకండేం! ఇది నా వ్యక్తిగత అభిప్రాయం మాత్రమే. అంటే మగవాడిగా పుట్టి ఆ స్వేచ్ఛా-స్వాతంత్ర్యాలు అనుభవించాక {పెళ్లయిన క్షణం వరకు:-( } అలా కష్టం అని అన్నానంతే కానీ మరోలా అర్థం చేసుకోకండి.

మరి బ్లాగ్రాజులు మీరేమంటారు ఇక్కడ సెలవివ్వండి. బ్లాగ్రాణులు కూడా ఈ ప్రశ్నను కొద్దిగా మార్చి మరుజన్మలో (ఉంటే గింటేనే సుమా!) మగవాడిగా పుట్టాలనుకొంటున్నారా? కు సమాధానమివ్వండి. కాకపోతే ఎవరిచ్చినా మీ సమాధానాలు నిజాయితీగా ఇవ్వండి.