ఇన్-ఫాచ్యుయేషన్.

ఇన్-ఫాచ్యుయేషన్
______________

టీనేజీలో ప్రేమేంటీ?
అన్నారందరూ...

అది అప్పుడే మొగ్గలేస్తూన్న
పసి వయస్సు...

కులం, మతం కల్మషం అంటని
పసి మనస్సు...

అప్పుడు నాటుకున్న ప్రేమ విత్తనం
లేలేతగా చివురుతొడిగి
తీగెలు, తీగెలుగా మనస్సంతా
అల్లుకుంటుంది.

గుత్తులు, గుత్తులుగా విరబూసే
సౌహార్దపు పూల సౌరభం
మదినిండా పొంగి పొర్లుతుంది.

కొద్దిరోజుల్లోనే ఆ చిన్ని మొక్క
కొమ్మలు రెమ్మలుగా విస్తరించి
శాఖోపశాఖలై వటవృక్షమౌతుంది.

విధి వైపరీత్యం వల్ల
ఆ ప్రేమ...
మొదలంటూ నరికిన చెట్టులా కూలిపోతే
మిన్ను విరిగి నేల పడ్డట్టు ఆ హృదయం బద్దలవుతుంది.

హృదయాంతరాల్లోకి చొచ్చుకుపోయిన బలమైన వేళ్లు
ఏ తుఫానూ పెళ్లగించలేకపోయినా...
ఆ హృదయానికి పెట్టిన గాటు నుంచి
జ్ఞాపకాల రక్తం స్రవిస్తూనే ఉంటుంది.