క్రీస్తు పూర్వం,1975.

డిసెంబరు 24 (క్రీస్తుకు ముందు) పుట్టాను కాబట్టి, అందరికీ నా పుట్టినరోజు ఎప్పుడంటే బి.సి. లో పుట్టానని తమాషాగా చెప్తూంటాను. మొత్తానికి ఈ విశాలవిశ్వంలో, అతిచిన్న పరిణామమైన 31సం. దిగ్విజయంగా ముగించి, నా జీవితంలో ముఫైరెండో ఏటిని ప్రారంభించబోతున్నాను. పోయినేడాది నా పుట్టినరోజు చాలా నిస్సారంగా గడిచింది. 30 ఏళ్లు నిండాయి, జీవితంలో అర్థభాగం గడచిపోయింది...ఏదో పోగొట్టుకున్న భావన. కానీ నేడలా లేదు... చదువుపరంగా, వృత్తిపరంగా రేపటి ఏడాది చాలా ఆసక్తికరంగా ఉండబోతోంది. అదీ కాక మన తెలుగు బ్లాగ్సమాజం లో ఒకడిగా నా మదిలోని ఆలోచనలు మీతో పంచుకుంటూ నిత్యయవ్వనాన్ని అనుభవిస్తున్నాను. కాబట్టి నా ఈ పుట్టినరోజు ఇలా ఈ జగద్వలయంలో జరుపుకొంటున్నాను.

(పైనున్న చిత్రం లో లీలగా కన్పించే ఆ నీలి చుక్క ఏమిటో తెలుసా? మనం నివసించే 'ఈ భూమి'. నాసా వారి 'వోయేజర్' ఇక్కడి నుంచి నాలుగొందల కోట్ల మైళ్ల దూరం నుంచి 1991 లో తీసి పంపిన చిత్రం. ఇన్ని విజయాలు, విషాదాలు, యుద్ధాలు, రక్తపాతాలు, మోహాలు, అడ్డుగోడలు...అన్నీ ఇందులో ఎంత ?)