ఇంట గెలిచాం...ఇక రచ్చ గెలుద్దాం: దేశిపండిట్!

తెలుగు బ్లాగ్లోకం వింటిని వీడిన బాణంలా రివ్వున దూసుకుపోతోంది. ఎన్నెన్నో కొత్త బ్లాగులు, కొంగ్రొత్త టపాలతో కూడలి, తేనెగూడు కళకళలాడుతున్నాయి. తెలుగు బ్లాగులకు ఈ అంతర్జాలంలో ఘనమైన గుర్తింపు కూడా ఉంది. కానీ ఇవన్నీ మన తెలుగు వారికే తెలుసు, మిగతా ప్రపంచానికి మన తెలుగు బ్లాగుల వాడి-వేడి తెలియజెప్పడమెలా? అనే ప్రశ్న చాలా మందికి వచ్చింది. వీవెన్ 'క్రాస్ రోడ్స్' తో ఇలాంటి ప్రయత్నం చేస్తున్నాడు.

అలా నేనూ కొంత ఆలోచించాను. ఇంతలో...మొన్న ఇండీబ్లాగీస్ పోటీలో నెగ్గిన పలు బ్లాగులు చదువుతున్నప్పుడు 'ఉత్తమ బ్లాగు వేదిక' మరియు 'ఉత్తమ రూపకల్పన' పోటిలో విజయం సాధించిన 'దేశిపండిట్' బ్లాగు నన్నాకర్షించింది. వైవిధ్యమైన పలు భారతీయభాషల బ్లాగులను ఒకచోట చేర్చి పాఠకులకు అందజేసే ఈ వినూత్నమైన ఒరవడి నచ్చి అక్కడ మన బ్లాగుల కోసం చూస్తే కన్నడ,తమిళ,మరాఠీ,బెంగాళీ,హిందీ బ్లాగులుండి 'తెలుగు' బ్లాగులు లేకపోవడంతో మనస్సు చివుక్కుమంది.

వెంటనే 'దేశిపండిట్' వ్వవస్థాపకుడైన ప్రతీక్/పాట్రిక్స్ కు ఓ ఈ-లేఖ పంపాను. తను కూడా అమిత ఆసక్తితో తెలుగు బ్లాగులను ఆహ్వానిస్తూ, తెలుగు బ్లాగుల నిర్వాహకుడిగా నాకు అవకాశమిస్తూ, మన తెలుగు బ్లాగ్ప్రపంచానికి ఘనస్వాగతం పలికారు. మనకున్న తెలుగు బ్లాగులకు ఓ కూడలి, మరో తేనెగూడు ఉన్నా ఈ 'దేశిపండిట్' ముఖ్యోద్దేశం, ఉన్న వందల బ్లాగుల్లో నుంచి ఉత్తమమైన 'టపా'లను సేకరించి తెలుగులో, ఆంగ్లంలో చిన్న వ్యాఖ్యానంతో ప్రపంచానికి పరిచయం చేయడం. ఇక్కడ మన బ్లాగుల్లోని వైవిధ్యాన్ని తెలుగువారితో పాటు, తెలుగు మీద ఆసక్తి ఉన్న ప్రతి ఒక్కరికీ తెలియజెప్పటం ద్వారా మనకు తెలియని చాలా మందికి ఉత్సుకత కలుగజేయవచ్చు.

ఆరులక్షలకు పైగా హిట్లతో, నెలకు అరవైవేలకు పైగా పుటల వీక్షణ కలిగిన 'దేశిపండిట్'లో ఇలా తెలుగు బ్లాగులను పరిచయం చేసే అవకాశం కలగడం నా అదృష్టంగా భావిస్తూ... ఈ విషయంలో మీ సహాయసహకారాలను ఆశిస్తూ...ఈ శుభవార్త మీతో ఇలా పంచుకొంటున్నాను. ఈ సోమవారం నుంచి ప్రారంభించిన ఈ ప్రయాణం నిర్విఘ్నంగా సాగాలనీ, ఇది ఇంకా ఆరంభం మాత్రమే కాబట్టి మిగతా టపాలను తొందర్లో చూస్తారనీ, కనీసం వారానికి కనీసం ఏడు ఆపై ఆణిముత్యాలను మీకందించాలని నా ప్రస్తుత ప్రణాళిక. నా చూపు దాటిపోయిన ఆసక్తికర టపాలను మీరూ ఇక్కడ సూచించవచ్చు.