ఏను తెలుగు వల్లభుండ!

తెలుగు వారందరి చేత ఆప్యాయంగా 'అన్నా' అని పిలిపించుకొన్న విశ్వవిఖ్యాత నట సార్వభౌముడు "ఎన్.టి.ఆర్", 'దివిజ రాజన్యుల గుండియల్ దిగ్గు రనగ నరుగుచున్నాను అమరపురికి' అంటూ మనల్ని వదలి నేటితో 11 సంవత్సరాలు. మన తెలుగు ప్రజల పైన రాజకీయంగా, సామాజికంగా, సంస్కృతీ పరంగా ఆయన వేసిన ముద్ర ఎప్పటికీ చెరగిపోనిది. అప్పటివరకు మద్రాసీలుగా పిలువబడ్డ మనకు ప్రత్యేక గుర్తింపు ఇచ్చి, ప్రపంచవ్యాప్తంగా తెలుగు ఆత్మాభిమానపు బావుటా ఎగురవేసిన ధీరోదాత్తుడు.

కథానాయకుడై రాముడిగా, భీముడిగా, కృష్ణుడిగా, రావణుడిగా, భీష్ముడిగా, ధుర్యోధనుడిగా, శ్రీకృష్ణదేవరాయలుగా, తోటరాముడిగా, బండోడిగా, బొబ్బిలిపులిగా, కొండవీటి సింహంగా, శ్రీనాథుడిగా, విశ్వామిత్రుడిగా, చండశాసనుడిగా, ఇలా చెప్పుకుంటూ పోతే ఎన్నెన్నో పాత్రల్లో జీవించి, ఎన్నో ఏళ్లు తెలుగు ప్రజలను రంజింపజేసిన ఆయన ఆంధ్రప్రదేశ్ రాజకీయాల్లో సంచలనం సృష్టించి ఎందరెందరికో రాజకీయ భిక్ష పెట్టి, ఢిల్లీలో తిరిగే రాజకీయాలను గల్లీ లోని పేదింటి వారి వరకు తెచ్చిన విప్లవ నాయకుడు.

నిమ్మకూరులో ఓ సాధారణ రైతు కుటుంబంలో పుట్టిన ఈ 'నందమూరి తారక రాముడు' తన చివరి క్షణం వరకు పేదప్రజల పక్షపాతిగా, వారికి ఇంత కూడు, గుడ్డ, నీడ ఉండాలని తపన పడి అందుకోసం శ్రమించిన నాయకుడు. రాజకీయనాయకుడుగా కొన్ని నిర్ణయాలు, కులం పరంగా ఆరోపణలు ఈ చంద్రుడిలో మచ్చలా మిగిలినా అచ్చమైన, స్వచ్ఛమైన తెలుగు నాయకుడు. జనవరి 18, 1996 నా అభిమాన నాయకుడి మరణవార్త విన్న క్షణం ఎంతలా ఏడ్చానో. వెన్నుపోటుతో నీతి, నిజాయితీలకు సమాధి కట్టి అందలం ఎక్కిన వారిని నేనెన్నటికీ క్షమించలేను.

ఆ వెన్నుపోటే జరగకుంటే ఆనాటి రాజకీయచిత్రంలో ధృవతారగా ఉన్న ఎన్టీయార్ మన 'దేశప్రధాని' ఖచ్చితంగా అయిఉండేవారు, మన పక్కింటి దేవెగౌడకు ఆ అవకాశం వచ్చింది. 2000లలో కేంద్రతపాలా శాఖ విడుదల చేసిన ఈ స్టాంపు 'అ'మ్మలోని ప్రేమను, నా'న్న'లోని సంరక్షణను అందించే 'అన్న'గా ఆయనకు నివాళులర్పించింది. రాయలసీమ దత్తపుత్రుడిగా తనను తాను అభివర్ణించుకొన్న ఆయన, 'నందమూరిపురం'గా ఖ్యాతికెక్కిన మా హిందూపురం శాసనసభ్యుడిగా తన చివరి క్షణాల వరకు సేవలందించారు. అన్నా! అందుకో నా నివాళి.